Онытылган хисне бию ит!

Неон дөнья утында җылы бишек,
Реклам уты тәрәзәне керә тишеп.
Дымлы шәһәр улый, дулый. Чү...
Сабый йөрәкнең ритмын ишет.
Курку сизәрме ул, шат булырмы?
Бәхет елатырмы аны, сагышмы?
Кара күктә якты салют уты
Хәтерләтерме аңа сугышны?
Илһамланырмы ул үткәннәрдән,
Онытырмы безне, нәфрәт итәрме?
Бәлки шакыр күңеленә бер хис?
Буыны белән онытылган ул хис
Күңел үзәгенә барып җитәрме?
Шәһәр тавышында батармы ул?
Кызыл йөрәк өчен югалтырмы үз-үзен?
Баллы төтен тулы яшь төннәрне
Тиң ярына багышлармы?
«Синең белән тыныч, бәгырем»
Неон шәһәр, сәгать төнге ике...
Нәни йөрәккә бишек бирә бит.
Яңа хәрәкәтләр табып, балам,
Онытылган хисне бию ит!

2024, апрель
Мәскәү

Өстәл асты

Өстәл астында җылы һәм тыныч,
Анда качып була курку төшкәндә.
Зурлар иелеп карамас та, эзләмәс тә,
Өстәл асты артык аста, артык аяк тирәсендә,
Өстәл асты абруй өчен артык кечкенә.
Өстәл асты тозлы кыяр өчен, минем өчен
Өстәл асты шаулы дөнья тыныч почмагы.
Өстәл асты тузаннары китап тышын кочар өчен,
Бармак белән гаилә рәсемен ясарга –
Өстәл асты тузаннары ялгызлыкны басар өчен җыела.
Өстәл асты – аяк арасында калган фикер җыелмасы,
Әкиятләр чынга аша торган шакмак ул.
Өстә соры ыгы-зыгы, әйтелмәгән сүзләр тулы табын,
Өстәл асты – балачакның серле атмосферасы.

2023, декабрь
Мәскәү