Әдәбият

«Такташ һаман безнең арада»

25 марта 2025 - 14:00 Автор:

Идел

23 мартта Г.Камал исемендәге Татар дәүләт Академия театрының яңа бинасында Һади Такташка багышланган «Такташ fest» проектының йомгаклау өлеше узды.

Проект үз эченә берничә чараны: радиода Һ.Такташның шигырьләрен уку, «Такташ fest» яшь шагыйрьләр бәйгесе, «Билгеле/билгесез Такташ» лекториесе, «Такташ эзләреннән» дип исемләнгән җәяүле экскурсияне алган иде. Йомгаклау өлеше Һ.Такташ һәйкәленә чәчәк салу белән башланып китте.

«Такташны укучы әле исән икән»

«Журналистларга олы рәхмәтемне белдерәм. Соңгы вакытта Такташка багышланган конференцияләр дә узмый башлады. Традиция буенча андый чаралар гел ТР Фәннәр академиясе тарафыннан гына үткәрелә иде, чөнки биредә Хатыйп Госман, Хәсән Хәйри, Нил Юзеев – Такташның төп белгечләре эшләде. Кызганычка, бу тәртип бозыла башлады, әмма журналистлар бик күп көч җыеп, бу проектны әзерләделәр. Мин лекцияне үткәргән вакытта «Такташны укучы әле исән икән» дип уйлап куйдым, чөнки ул әңгәмәгә бик күп кеше килде, еш кына кызыклы сораулар ишетелде», - дип сөйләде оештыруда зур өлеш керткән доцент, филология фәннәре кандидаты Миләүшә Хәбетдинова.

Миләүшә ханым, шулай ук, Такташның каберенә кереп булмау проблемасы турында әйтте. Ул йозакка ябык булу сәбәпле, бөек шагыйрьнең кабере өстендә дога кылып та булмый дигән фикер яңгырады.

«125 еллыкка менә дигән старт бирелде, аны фәкать сүндермичә дәвам итәргә кирәк»

Аннары шигъри-музыкаль кичә башланды. Концертны Татарстанның халык артисты Фәнис Җиһанша алып барды. «Татмедиа» акционерлык җәмгыятенең PR-директоры Ләйсән Сафина әлеге чараның әһәмиятен ассызыклады:

«Гадәттәгечә, без олуг шәхесләребезне фәкать юбилей елында гына искә алырга, аларга багышлап төрле кичәләрне үткәрергә күнеккәнбез. Ә без әлеге проектны башлап җибәргәндә, киресенчә, Такташның 125 еллыгына ике ел алдан әзерләнә башладык. Безнең татар аудиториясенә лекторий, экскурсияләр тансык икәнен күрдек. Такташ һаман безнең арада, ул әле дә иҗатта яши.125 еллыкка менә дигән старт бирелде, аны фәкать сүндермичә дәвам итәргә кирәк», - диде ул.

Концерт ахырында ТР Дәүләт Советы депутаты, «Яңа Гасыр» телерадиокомпаниясенең генераль директоры Илшат Әминов «Такташ fest» яшь шагыйрьләр бәйгесе җиңүчеләрен тәбрикләде. 20 катнашучы арасында 5 кеше генә призлы урынга лаек булды. Бәйгенең нәтиҗәләре:

1 урын – Булат Ибраһимов һәм Гөлүсә Батталова.

3 урынга – Зөһрә Рамазанова лаек булды.

Кызыксындыру бүләген Гөлназ Әхмәдиева һәм Илнар Фатыйхов алдылар.