Аксубай районында 3 метрлы елан килеп чыккан

61 яшьлек Рафаэль Вәлиуллин бакча башындагы печәнне чаптырганда бакчаларына зур гына елан шуышып кереп киткәнен күреп ала. Ләкин югалып калмый – шул арада чапкычны туктатып, трактордан сикереп төшә дә, кабинадан монтировканы эләктереп, еланга бер генә кизәнә:

- Елан тиз генә үлми ул, бөтәрләнергә кереште. Мин тагын бер-икене кундырдым да монтировка башы белән еланны читкәрәк алып ташладым, – ди Рафаэль абый. –  Күтәрә торган түгел, авырлыгы! Җитмәсә кеше буеннан да озын. Мин аны бакча буйлап үрмәләр дә, ишегалдына керер, идән астына ияләшер дип курыктым, - ди.

Рафаэль абыйга еланнар дөньясы аңа яхшы таныш, чөнки ул 10 еллап урманчы хезмәтендә тир түккән.

- Урманчы булып эшләгәндә еланнарның ниндиләрен генә күрмәдем. Берсендә елан туена юлыктым. Алар әллә ничәү бер-берсенә уралышып бетәләр, башлары да, койрыклары да күренми, кап-кара бер йомгак инде, әвәрә-түнә килеп яталар, – ди.

Бүгенге көндә ул мәктәптә оператор вазыйфасын башкара. Җәмәгате Римма ханым авыл җирлеге идарәсендә сәркатип булып эшли. 

чыганак: Шәһри Казан