Шиһабетдин Мәрҗанигә багышланган «Укытучы» фильмын төшерү башланды

Ул дәвергә тарихи яктан охшаш булган берничә локация сайланган. Шуларның берсе – Яшел Үзән районының Исаково авылында «Татар Авылы» этноавылы.  Икенчесе – Шәриф Камал музей-йортында.

Фильмның сюжеты Мәрҗанинең балачак елларын, аның уку һәм XIX гасыр ислам мәдәниятенең төп үзәкләрендә – Бохара һәм Сәмәркандта галим буларак формалашу чорын үз эченә ала. Үзбәкстанда төшерү процессы декабрьдә Бохарадагы Мир-и-Араб тарихи мәдрәсәләре территориясендә башланган иде. Анда үз вакытында Шиһабетдин Мәрҗани укыган. Мәдрәсәдә 2019 елда галимнең тууына 200 ел тулу уңаеннан урнаштырылган истәлекле язу сакланган.

Төшерүчеләр «Укытучы» – биографик драма гына түгел, ә белем кыйммәтләре, галимгә хөрмәт һәм рухи эзләнү турында заманча җәмгыять өчен актуаль булган фильм да, дип ассызыклый. Фильм киң халыкара аудиториягә исәпләнгән.

Фильмның генераль продюсеры – Миләүшә Айтуганова (Татарстан), Үзбәкстаннан продюсер – Абдрауф Жураев.  

Яшь Шиһабетдин Мәрҗани ролен Г.Кариев театры артисты Булат Гатауллин башкара. 

Фильмның Татарстаннан режиссеры – Рамил Төхвәтуллин, Үзбәкстаннан – Илхом Мөхәммәдиброхимов. 

Сценарий авторлары – Салават Юзеев һәм Шойим Бутаев.

«Укытучы» фильмының премьерасы 2026 елның сентябрь башында Казан халыкара «Алтын минбар» кинофестивале кысаларында күрсәтелер дип көтелә. 

Проект ике илнең иҗади коллективлары катнашында тормышка ашырыла һәм Үзбәкстан белән Татарстан арасындагы мәдәни һәм гуманитар хезмәттәшлекне үстерүгә зур өлеш буларак карала. Фильм төшерүчеләр тамашачыларны төрки һәм ислам дөньясының гомуми тарихы һәм рухи мирасы белән таныштырырга тиеш, дип ассызыклыйлар.