Элек фәнне өйрәнү аерым катлам кешеләр өчен генә мөмкин булган, бүген исә теләгән һәркем өчен мәгълүмат җитәрлек: фәнни-популяр әдәбият кызыклы һәм җиңел тел белән галәм төзелеше, кешелекнең барлыкка килүе һәм баш миенең ничек эшләве турында сөйли.
Ләйлә Миңнуллина, биолог:
Иосиф Шкловскийның «Вселенная, жизнь, разум» китабы – хаксызга онытылган кызыклы басмаларның берсе. Китап җиңел укыла, авторы җор телле, шуңа көлкеләр, шаяртулар да күп. Кешелекнең киләчәге, чит планета цивилизацияләре барлыгы/юклыгы, ни сәбәпле без аларны һаман да очратмавыбыз астрономия фәне белән кызыксынучы киң катлам укучылары өчен кызыклы булачак.
Иосиф Шкловский «Вселенная, жизнь, разум» 12+. Китап танылган совет астрофизигы тарафыннан язылган, заманында җиде тапкыр басылып чыккан. Кешелекнең галәмдәге урыны, тереклек барлыкка килүе, чит цивилизацияләрнең булу мөмкинлеге һәм алар белән элемтәгә керү ихтималы турында. Ул SETI (Search for Extraterrestrial Intelligence) проекты һәм астробиология фәне барлыкка килгән вакытта язылган, беренче басмасы 1962 елда дөнья күргән. Хәзер без космос белән бәйле яңа ачышлар ясадык, әмма шул чор галимнәренең ничек фикер йөртүләре һаман кызыклы.
Руслан Ибраһимов, рәссам:
Бу китапны инде бик күптән укысам да, әле дә тәмләп үз эчемнән уйлап йөрим. «Апгрейд обезьяны» китабын рациональлек гимны дияр идем. Ул дөнья килеп чыгышы турында фәнни яктан сөйли. Шул ук вакытта юмор да юк түгел. Китап мине критик фикерләүгә этәрде дисәм дә артык булмас.
Александр Никонов «Апгрейд обезьяны. Большая история маленькой сингулярности» 18+. Никонов – фәнни-популяр темаларны провокацион итеп яза белә торган автор. Әлеге китап технологик прогрессның кеше табигатенә бәйлелеге турында. Автор бу темаларны ирония белән ача, кайчакта бераз кабартып та яза һәм еш кына кызыклы нәтиҗәләргә килә. Китапны фәнни нигезе сай дип тәнкыйтьләүчеләр дә бар, әмма ул дөнья төзелешенә фәнни яктан карарга ярдәм итә.
Илһам Галиуллин, астрофизик:
Үзем астрофизика өлкәсендә фәнни эшчәнлек алып барганлыктан, нигездә профессиямә караган фәнни хезмәтләр укыйм. Фәнни популяр әдәбият белән кызыксынучыларга «Узнать за 30 секунд» сериясендә чыккан китапларны тәкъдим итәр идем.
Бэтти Ник, Марк Феллоу, Клегг Брайан, де Грут Изабель «Эволюция за 30 секунд» 6+. Бик күп темаларны кыска форматта ачып сала торган мини-энциклопедияләр сериясенең чираттагы китабы. Эволюция турындагы китапны дөньяның алдынгы галимнәре әзерләгән. Һәрбер темага күп дигәндә ике бит бирелә. Шул ике бит эчендә гади тел белән фәнни фактлар, ачышлар турында сөйләнелә. Китап үсмер яшьтәге укучылар өчен исәпләнсә дә, олы кешеләргә дә кызыклы.
Надир Баһавиев, инженер-конструктор:
«От нуля к единице» дигән китап бик ошады. Автор бу китапта уңышлы стартап башлау серләрен чишә. Шул ук вакытта гомерне озынайту, космик очышлар, ясалма интеллект, көнкүреш роботлар төзү турында яза һәм киләчәкне фаразлый.
Питер Тиль, Блейк Мастерс «От нуля к единице. Как создать стартап, который изменит будущее» 12+. Китап авторлары – танылган эшмәкәрләр. Алар үз тәҗрибәләреннән чыгып, компанияләрнең уңыш формуласын булдыралар. Авторлар булачак бизнесменнарга киңәшләр бирә һәм киләчәктә файдалы булырдай стратегияләр тәкъдим итә. Шулай ук монополистик компанияләрнең бу дөньяга тәэсире турында да сөйләнелә.
Нет комментариев