Кукмара районына юл тоттык. Героебыз – күпләргә таныш блогер, тракторчы Василий Иванов. Ул стилен алыштырырга булган...
Съемкаларга әзерләнгәндә без ир-атлар киеме генә сатыла торган аерым кибетләр тапмадык. Шуңа героебызга киемнәр эзләү бераз авырга туры килде, әмма барысы да без теләгәнчә булды! Кукмарадагы беренче локациябез – базар. «Базар» дигәч, модадан чыккан чуар киемнәр белән тулган мәйданчык күз алдына киләдер. Ә Кукмара базарында стильле, актуаль фасондагы кием-салымны табып була. Сатучылары да ачык йөз белән каршы алып, образлар сайларга ярдәм иттеләр. Икенче нокта – Кукмара яшьләре тәкъдим иткән «Ратмир» сәүдә үзәге. Биредә ассортиментында ир-атлар киеме генә булган ике кибеткә тап булдык. Стилист, тапшыруны алып баручы Исмаил Сафиулов героебыз килүенә берничә төрле образ әзерләде.
Исмаил Сафиулов стилист, тапшыруны алып баручы:
– Районга зур өметләр багламыйча, нәрсә булса, шул була дип бардым. Образлар җыя алачагыбызга ышандым. Кукмарадагы кием кибетләрендә ассортимент еш яңартылмавы сизелде анысы. Өске кием бер хәл, ә менә кычкырып торган логотипларсыз аяк киемен табу квестка тиң булды.
Василий – гаҗәеп позитив герой. Аның белән эшләве миңа җайлы булды, чөнки ул үзгәрешләргә әзер иде. Аны төрле яктан күрсәтәсем килде: эшлекле ир-ат, спортсмен һәм стильле блогер була алуын чагылдырырга тырыштык.
Нет комментариев