Укырга вакыт булмаганда нәрсә укырга?

Без сезнең проблеманы чишәргә тырыштык. Тәүлеккә тагын берничә сәгать өстәп булмады анысы, әмма укырга вакыт булмаганда да укыла торган китапларны сезнең хозурыгызга тупладык.

Рәфидә Галимҗанова, журналист:

Китапның форматы кечкенә, үзең белән алырга да уңайлы. Китап минем эш өстәлендә ята. Автор төп героен кабердән «чыгара» (спойлер өчен гафу) һәм син әсәрнең ахырына кадәр зират буйлап аның «артыннан» йөрисең. Автор геройларының психологиясен шундый оста итеп тасвирлый ки, укый-укый китапның яртысына җиткәнеңне сизми дә каласың. Вакытым аз булганда бу китапны кулга алам. Рәмис абый китапны үзе бүләк итте.

Рәмис Латыйпов «Атмый калган таң» 12+. Журналист, язучы, «Интертат» сайты баш мөхәррире Рәмис Латыйповның «Атмый калган таң» китабы күптән түгел генә тәкъдим ителде. Әлеге китап «Казан утлары» журналы китапханәсе сериясендә өч мең тираж белән басылып чыкты, әсәрнең бер өлеше «Идел» журналында да дөнья күрде. Язучы әйтүенә караганда, китап чынбарлыкта булган хәлләргә нигезләнеп язылган. «Атмый калган таң»га барлыгы 4 хикәя кергән.

Динара Зиннәтова, журналист, блогер:

Галимҗан Гыйльмановның «Китек ай» китабын мин ун ел элек Татар китап нәшрияты кибетеннән сатып алган идем. Бу повестьлар, хикәяләр, парчалар җыентыгы. Шуларның берсе – «Китек ай». Кешелеккә ышанычны кайтара торган бик җылы һәм рәхәт әсәр. Тәмле чәй ясап, йомшак кәнәфигә утырып, ләззәтләнеп укый торган китап. Тормышта яктылык эзләүчеләргә бик тә киңәш итәм.

Галимҗан Гыйльманов «Китек ай» 12+. Галимҗан Гыйльмановның проза жанры әсәрләренә модернизм сыйфатлары хас дияргә булыр иде. Әдип – хыялый фантаст. Маҗаралы әсәрләрендәге вакыйгаларга хыялны куша ул. Шул сәбәпле, образлар бирелешендәге серлелек, композицион интрига, психологик киеренкелек бар. «Китек ай»ның тулы версиясен интернетта язма форматта да, аудио форматта да табарга мөмкин.

Аида Сәйдәш, «Кунакта» рум-турларын алып баручы:

Вакытың кысан булуга карамастан, үтереп укыйсы килсә, график романнар укырга тәкъдим итәм. Текст әз, матур рәсемнәр күп. Шул жанр аша төрле темалар күтәрелә. Хәтта физика һәм химияне дә график роман ярдәмендә аңларга була. Мондый форматта укыган соңгы әсәрем – Райан Эндрюсның «Мы дали слово» дип аталган романы.

Райан Эндрюс «Мы дали слово» 6+. Кечкенә генә шәһәрчектә халык ел да була торган бәйрәмгә җыела. Риваять буенча, ул көнне елгага фонарьлар агызып җибәрсәң, алар киек каз юлына йолдыз булып менәчәкләр, имеш. Китапның каһарманнары риваятьнең дөреслеккә туры киләме, юкмы икәнлеген үзләре тикшереп карарга була. Аларның бу маҗаралары кая китереп чыгарыр?

Нур Хөсәенов, режиссер, актер:

Кәефкә карап классикларыбызны кулга алам. Мөхәммәт Мәһдиев, Нурихан Фәттахларны укыйм. Соңгы арада чыннан да күләмле әсәргә вакыт җитеп бетми. Ярый интернеттан күп әйберне табып алып укырга була. Вакыт булмаганда укырга О.Генриның новеллалары бер дигән.

О.Генри Новеллалар 6+. О.Генри – XIX гасыр Америка язучысы, ул кыска хикәяләр һәм новеллалар остасы. Чын исеме Уильям Сидни Портер. Прозаикның иң танылган әсәрләре: «Дары волхвов», «Меблированная комната», «Русские соболя», «Трест, который лопнул». О.Генрины белмәгән кеше әз, мәктәп программасына да кертелгән. 1918 елда О. Генри премиясе булдырыла, аны иң яхшы хикәя язучыларга бирәләр.

Гүзәлия Гыйльметдинова, стилист:

Хәзер күбрәк эш буенча укыйм. «Зоопарк в твоей голове» дип аталган кызыклы китап бар. Ул психология турында. Әйтик, «отличник», «ялганчы» кебек синдромнарның ничек, каян барлыкка килүе һәм аннан ничек арынырга икәне дә язылган. Бик файдалы!

Лабковский, Мужицкая, Примаченко «Зоопарк в твоей голове» 16+. Дөньядагы беренче психологик синдромнар китабы. Китапка хәзер бик танылган һәм трендта булган «ялганчы», «коткаручы» синдромнары да, беркем дә белми торган синдромнар да кергән. Китапның авторлары – Россиянең иң популяр психологлары Татьяна Мужицкая, Ольга Примаченко, Михаил Лабковский, Артем Толоконин, Юлия Пирумова, Ольга Берг, Игорь Романов һәм башкалар. Һәрбер автор теге яки бу синдром турында мисаллар белән аңлата.