Хатын-кыз авторларның шәп әсәрләре

Ләкин бу беренче карашка гына. Хатын-кызның каләме дә менә дигән әсәрләр язарга сәләтле. Языгыз, кызлар, һәм укыгыз!

Рәдиф Кашапов, журналист, музыкант, язучы:

Яшүсмер чакта нык тәэсир иткән китабымның комиксын узган ел укыдым, Boo Radley рәсемен күргәч, елый ук башладым. Гомумән, балалар күзлегеннән язылган китаплар, гадәттә, иң шәпләреннән була.

Ли Харпер «Убить пересмешника» 12+. Америка язучысы Ли Харпер әлеге китабын 1960 елда бастыра. Ә 1961 елда шуның өчен Пулитцер премиясе ала. Романның төп герое Джин-Луиза Финч исемле кыз. Ул үзенең абыйсы Джим һәм адвокат булып эшләүче әтисе белән яши. Балаларның җәйге каникуллары күршеләрендә яшәүче сәер Рэдли исемле кеше һәм аның тирәсендәге серне чишү белән үтә. Ә бу вакытта балаларның әтисе адвокат буларак бер ир-атны яклауга алына һәм бу эш бөтен шәһәргә, шул исәптән балалар тормышына да тәэсир итми калмый. Вакыйгалар йомгагы ничек сүтеләсе азакка чаклы сер булып кала.

Гөлүсә Баттал, шагыйрә:

Әлбәттә, мин әдәбиятны хатын-кыз язучы, ир-ат автор дип бүлеп укымыйм. Бүгенге авторлардан иң яратканнарымның берсе – Ландыш Әбүдәрова. Аның прозасы 100% яратудан тора. Яратулы сагыштан. Яки киресенчә, сагышлы яратудан. Ярату дигәч тә, сез аны ир-ат һәм хатын-кыз мәхәббәте турында гына яза икән дип нәтиҗә чыгарып куймагыз. Аның әсәрләрендә ярату күпкырлы, мең төрле төсмерле, тирән, киң һәм биек. Аның «Мандариннар» исемле нәни генә җыентыгы бар. Заманча, әмма шул ук вакытта һәр өтер-ноктасыннан миллилек ургылып тора. Ландышның «Мандариннар» китабын укыгач, интернеттан авторның башка әсәрләрен дә табып укыгыз. Киләчәктә бу әсәрләр нигезендә төшерелгән фильмнар да булыр әле дип өметләнәм мин.

Ландыш Әбүдарова «Мандариннар» 12+. «Мандариннар» – Ландыш Әбүдәрованың басылып чыккан беренче китабы. Анда төрле елларда иҗат ителгән чәчмә әсәрләр: повесть, хикәяләр кергән. Әсәрдә сурәтләнгән дөнья – яңа заман кешеләренең яшәү рәвеше, аларның тормышка карашы. Автор аларны үзенчә бер калыпка салып бирә. Китап хәзерге чор прозасын сөючеләр күңеленә хуш килер. 2019 елда китапны Габдулла Кариев театрында тәкъдим итәләр. Сәхнәдә китапка кергән әсәрләрдән өзекләр дә куела.

Резедә Сәләхова, актриса:

Айгөл Әхмәтгалиеваның хикәяләрен, повестьләрен яратам. Иң яраткан әсәрем – беренче татар актрисасы Сахибҗамал Гыйззәтуллина-Волжская турындагы «Туташ» романы. Мин ул әсәр буенча аудиокитап та яздырдым. Айгөл апа нинди генә темага гына язса да, тәмле тел белән яза белә. Ни кызганыч, әдәбиятыбызга урам теле керә башлады, темалар да бозык. Ә Айгөл апаның теле искиткеч камил.

Айгөл Әхмәтгалиева,«Туташ» 16+. Роман татар театрына нигез салучы булган, мөселманнар арасында беренче актриса, соңрак режиссер һәм театр труппасы җитәкчесе булган Сәхибҗамал Гыйззәтуллина-Волжская турында. Аның язмышы XX гасырның киң колачлы тарихи вакыйгалары белән янәшә үрелеп бара. Китап аша без артистканың шәхесен, бәхетен һәм бәхетсезлеген, биографиясен беләбез. Әсәр укучыны үз дулкынына көйли һәм дулкынландыра.

Зилә Мөбәрәкшина, журналист:

Яратып укый торган китапларым арасында хатын-кыз авторлар бик сирәк. Шуларның берсе – инглиз язучысы Шарлотта Бронте. Бу көннәрдә аның «Джейн Эйр» дигән әсәрен укыдым. Миңа төп героиня Джейн Эйрның позициясе ошый: ул тышкы матурлыкның эчке матурлык кадәр көче булмавын әйтә. Әгәр дә тышкы матурлык вакыт узу белән бетсә, эчке матурлык мәңгегә кала. Джейн Эйр өчен иң мөһиме – намуслылык. Тормыш принциплары аның өчен барыннан да өстен. Китапны драматик мәхәббәт тарихын яраткан һәркемгә тәкъдим итәм. Егетләргә ничектер – белмим, әмма кызларга бу китап, һичшиксез, ошаячак.

Шарлотта Бронте «Джейн Эйр» 16+. Бу роман хисләр белән тулы: беренче мәхәббәт, өметләр чәлперәмә килүе, якын дуслык һәм чын сөю. Әсәрдә ятим калган кыз Джейн Эйрның үзенең хуҗасы Эдвар Рочестерга булган мәхәббәт тарихы бәян ителә. Ул кешенең шәхес булып өлгереп җитүе, тормыш юлын һәм мәхәббәтен эзләп табуы турында.