Ильяс Мингазов: «Дөрес юлда икәнемне күптән түгел генә аңладым»

Ул иң элек MINGAZOV кавер-төркеме солисты буларак танылса, хәзер инде үз җырларын да башкара. Сүзем Ильяс Мингазов тәхәллүсе белән иҗат итүче Ильяс Минһаҗев турында. Тыйнаклыгы, сөйкемлелеге белән җәлеп итүче Ильяс белән әңгәмәбез балачакта иҗатка тартылу хакында сөйләшүдән башланып китте.

«ДӨРЕС ЮЛДА ИКӘНЕМНЕ КҮПТӘН ТҮГЕЛ ГЕНӘ АҢЛАДЫМ»

Мин балачактан, үземне хәтерләгәннән башлап җырлыйм инде. Мәктәптә укыганда бик күп бәйгеләрдә җиңү яуладым. Нәфис сүз бәйгеләрендә дә шигырьгә бер куплет җыр өстәп, иҗади номер күрсәтә идем. Бөгелмәдә музыкаль мәктәпне тәмамлагач, алга таба шул юлны дәвам иттем – Казанның И.Әүһәдиев исемендәге музыка көллиятенә укырга кердем. Дөресен әйткәндә, уку дәверендә биш укытучы алыштырдым, ахыр чиктә Венера Хәсәновна һәм Эльвира Солтановна иң көчле укытучылар булып чыкты. Моны аңлар өчен миңа ике дәрес җитте.

Җырчы булырга балачактан ук теләсәм дә, үземнең дөрес юлда икәнемне күптән түгел генә аңладым әле мин. Шулай беркөнне машинада үзем генә барганда уй килде: миңа бит үзем башкара торган эшем шундый ошый! Әйе, иҗат юлында икеләнүләр күп булды, яшермим. Ләкин мин хәзер MINGAZOV проекты белән яшәгәнемне аңлыйм. Без татар эстрадасында беренче һәм әлегә бердәнбер кавер-төркем. Популяр татар җырларына яңа сулыш өреп, аларны яңача яңгырашта башкарабыз, быел төркем оешуга 7 ел була.

ТӨРКЕМ ЯҢАЛЫКЛАРЫ ТУРЫНДА

2023 елда продюсердан башка эшли башладык, ул вакытта безнең төркем шундый сорау алдында калды: проект яки юкка чыгачак, яки аны кемдер үз өстенә алырга тиеш. Фамилиям белән аталган төркемне җитәкләргә үзем алындым. Егетләргә бу хакта бары тик факт буларак кына әйттем, беркемне дә калырга мәҗбүр итмәдем. Нәтиҗәдә алар барысы да үз теләкләре белән төркемдә калдылар. Аннан соң инде ел ярым вакыт узды – эшебез дәвам итә, каверлар чыга, чыгышларыбыз да күп.

Бу урында продюсерга рәхмәтле икәнебезне ассызыклыйсым килә. Чөнки ул MINGAZOV төркемен булдырды һәм билгеле бер планка куйды. Без бүген дә эшне дәрәҗәне төшермичә алып барабыз. Мин үземне продюсер димәсәм дә, җитәкче буларак, аның эшен башкарам.

Яңалыкларыбыз да бар: үзебезнең репетиция базасы барлыкка килде. Моңа кадәр төрле урыннарны сорап ала идек, хәзер инде үзебезгә сатып алдык. Анда гыйнвардан репетиция ясый башладык. Быел сольный концерт белән төрле шәһәрләргә чыгарга ниятлибез: Әлмәт, Чаллы, Кукмарада, иң ахырда – Казаныбызда зур концерт оештырачакбыз. Шулай ук Уфага да барырга торабыз. Быел тагын 20 дән артык кавер чыгачак. Яшь артистларның да җырларын алабыз, шулай ук төрек җырлары да булачак, чөнки Төркиядә дә безне тыңлаучылар бар.

МОҢСУ ҖЫРГА ИЛҺАМ КАЯН КИЛӘ?

Чараларда чыгыш ясаганда шуңа игътибар итәм – тамашачы еш кына «Яшьлегем чишмәләре», «Уфтанма», «Туган як», «Әлдермешкә кайтам әле» җырларын сорый. Минемчә, бу җырлар халкыбыз күңеленнән беркайчан да китмәячәк, кимендә 15 ел әле шулай соралачак. «Сәләт»тә бәләкәй балалар да аларны яттан белә. Ә бит ул балалар – безнең дәвамчылар, димәк, бу җырларга мәхәббәт буыннан-буынга күчәчәк.

Кавер-төркемнән тыш, мин үзем дә «Ильяс Мингазов» буларак иҗат итәм. Текст авторларыннан Гөлфия Шакирова, Айгөл Вәлиуллина белән эшлим, музыканы Риваль Хисмәтуллин, Илназар, Илдус Дәүләнов иҗат итә. Һәр җыр минем тормышымнан алынып языла. Миннән еш кына «Син җавапсыз мәхәббәт, үпкәләтү турында җырлыйсың, алары да синең турындамы?» – дип сорыйлар. Нәрсә диим... Әйдәгез, монысы сер булып калсын?

«БЕРЕНЧЕ ТАПКЫР ТӨНЛӘ ШАЛТЫРАТТЫ»

Тырыша торгач, Ильясның шәхси тормышы турында да белергә насыйп булды. Хәер, узган ел бер очрашуда менеджеры булып эшләүче чибәр кыз – Рүзиләгә матур итеп каравына игътибар иткән идем. Ләкин икесеннән дә турыдан-туры сорарга менә хәзер генә тәвәккәлләдем. Баксаң, алар 4 ел элек танышкан икән. Серле мөнәсәбәтләре турында икесенең дә вариантын китерергә булдым.

Ильяс: Эшләремне төгәлләдем дә, төнгә каршы Казанга кайтырга чыктым. Юлда күңеллерәк булсын дип, юлдашлар эзли торган кушымтага яздым. «Унбиш минут эчендә җавап бирүче булмаса, бетерәм», – диюем булды, бер кыздан шалтырату килде. (Ул Рүзиләнең иптәш кызы булып чыкты – Авт.) Шулай итеп без өчәү матур гына сөйләшеп кайттык. Янымда утырган Рүзилә бик тыйнак, оялчан булып тоелды. Ул әле безнең гомеребезне саклап калды: арганлыгым барыбер үзен сиздереп, мин юлда йокыга киткәнмен. Берзаман Рүзилә төрткәненә уянып киттем. Ул вакытында мине уятып, каршыга килгән машинага бәрелүне булдырмый калды.

Рүзилә: Мин ул машинада бөтенләй буласы кеше түгел идем (көлә), чөнки әлеге кушымтаны кулланмыйм диярлек, аннары билгесез кеше белән ерак юлга чыгу куркыныч. Иптәш кызны берүзен җибәрмәс өчен мин дә иярдем. Без, кызлар, хәйләкәр бит инде. Килеп җиткәч, Ильяска акча күчерергә телефон номерын сорадым. Берәр кайчан бәлки кирәге чыгар дип саклап куйдым. Ә беркөнне тиктомалдан шалтыраттым...

Ильяс: Төнлә иде ул. Мин башта кем икәнен танымадым, әмма без Рүзилә белән ике сәгать сөйләшкәнбездер. Аннары ул миңа социаль челтәрдә «лайк» куйды һәм без аралашып киттек.

Рүзилә: Аралашу дип, даими язышу түгел иде ул: «Сәлам, ничек хәлләр?» – дигән кыска хәбәрләр һәм фотоларга «лайк» белән генә чикләнә иде. Мин аның җырчы икәнен дә социаль челтәренә кереп карагач кына белдем. Аннары концертларына йөри башладым.

«СЕЗ ЙӨРИСЕЗМЕ ӘЛЛӘ?»

Иң кызыгы – ул вакытта Ильясның йөри торган кызы, ә Рүзиләнең егете була. Бәлки шуңа күрәдер, алар дусларча аралашуны дәвам итә. Соңрак Ильяслар үзләренең төркеменә Рүзиләне видеомейкер булып эшләргә чакыра. Анда инде бары тик эшлекле мөнәсәбәттә аралашалар. Шулай да «Сез йөрисезме әллә?» – дигән сорауны еш ишетәләр. Ильяс, киләчәкне тоемлагандай, «Әлегә юк», – дип җавап бирә. Тик язмыш дигәнең барыбер үзенекен итә: Ильяс белән Рүзилә, ниһаять, бер-берсен ошатуларын белдереп, очрашып йөри башлый. Рүзилә белеме буенча лингвист – берничә тел белә, хәзер MINGAZOV төркемендә администратор, фотограф, видеограф эшен башкара.

Ильяс: Без Интернетта уртак фотолар кертәбез. Әлбәттә, шәхси тормышны яктырта башласам, караулар, «лайк»лар саны арта. Әмма шәхси тормыш сер булып калырга тиеш. Шунысын гына әйтәм – быел күңелле вакыйгалар күп булачак.

Рүзилә: Без Ильяс белән бер-беребезгә охшаган: еш кына бер үк вакытта бер сүзне әйтеп куябыз, хәтта хәрәкәтләребез дә кабатлана.

Ильяс: Сулыш алуыбыз да бер төрле дияр идем (елмая). Бу матур парга озак карап утырсам, күз тияр дип курыктым. Шуңа язмамны да төгәлләрмен инде. Ильясның мәхәббәт турында җырлары бик күп, тиздән яңа җырын да тәкъдим итәргә җыена. Ә менә сөйгәне Рүзиләгә дигәне әлегә тумаган. Димәк, аңа багышланган махсус җырны бергәләп көтәбез:)

фото: Фирүзә Вәлиева