«Көндәшләрем көчле иде, әмма мин үзем дә төшеп калганнардан түгел бит!» – «Ел таланты – 2024» премиясе

Ни генә дисәң дә, бу дөньяда сәләте булганнарны күреп, аларны үсендереп җибәрә белүчеләр бик кирәк. Мөгаен, Талантлар Университетын күрүче һәм күрсәтә белүче дип атарга буладыр. Меңләгән егет-кызга үз күңелләренә якын юнәлештә үсәргә мөмкинлек бирә ул һәм ел азагында иң-иңнәрне бер урынга, премия тантанасына туплый.

«Ел таланты» премиясен ТР Фән һәм мәгариф министрлыгы ярдәме белән Талантлар Университеты уздыра. Аның төп максаты – яраткан шөгылендә үсәргә, үзен күрсәтергә теләгән һәр яшь кешегә, остаз һәм укытучыларга ярдәм күрсәтү, иң лаеклыларны бүләкләү.

Премия әле яшь һәм нибары 2 нче тапкыр гына уздырылуына карамастан, шактый күп кызыксынучы, актив егет-кызларны үз тирәсенә җыярга җитеште. «Ел таланты – 2024» премиясенә исә 6 номинациягә барлыгы 1996 гариза килгән. Искитәрлек саннар бит! Әле үз сәләтен күрсәтергә кыюсызланып, «миннән булмас» дип ялгыш уйлап йөрүчеләр күпмедер – кыскасы, Талантлар Университетына эш күп әле. Кыюсызларга килгәндә... 

Журналны укучылар арасында да шундыйлар бар икән, бу язмадагы егет-кызларның үрнәге шәп илһам булыр дип уйлыйм. «Ел таланты – 2024» премиясе лауреатлары белән танышыйк!

АРИНА ПОПОВА

Казан милли тикшеренү технология университеты каршындагы сәләтле балалар өчен химияне тирәнтен өйрәнү лицей-интернаты укучысы;

Минем Талантлар Университеты белән танышлыгым 2023 елдан, химия буенча җәйге сменада башланып китте. Андагы үзгә мохиткә, кешеләрнең ачык, ихлас булуына шундук игътибар иткәнемне хәтерлим.

Премиягә гариза биргәндә үзеңнең грамота, җиңүләреңне күрсәтү шарт. Быелгы зур җиңүем – «Большие вызовы» бәйгесе, аның төбәк этабында «Арктиканы үзләштерү» юнәлешендә катнашкан идем.

Минем проект «Арктика диңгезләрендә нефть агымнарын бетерү диспергенты» дип атала иде. Арктика шартларындагы кырыс салкыннарда эшләү, нефть агымнарын бетерү аеруча катлаулы. Әмма диспергент белән эш күпкә җиңеләя, чөнки ул нефть табын күп вак бөртекләргә тарката һәм судан боз катламына менгерә. Анда исә нефть бөртекләрен табигый микроорганизмнар эшкәртә. Шул рәвешле диспергентлар нефтьның табигый таркалу процессын тизләтә.

Премиядә җиңәчәгемә ышандым. Көндәшләрем чыннан да бик көчле иде, әмма мин үзем дә төшеп калганнардан түгел бит!

Талантлар Университеты минем өчен бик кадерле урын, чөнки биредә мин үз фикердәшләрем белән аралаша, үсә алам. Иҗади уй-хыялларымны тормышка ашыру, карьерада яңа үрләр яулау юлында Университет, аның остазлары, укытучылары – чын терәк. Минем җиңүләремдә зур өлеше булган остазларыма – Диләрә Илнур кызы Фәтхуллинага һәм Резеда Гомәр кызы Багатовага рәхмәтлемен!

Прогресс белән бергә атлаучы, гел яңалыкка омтылучы, белемгә сусап яшәүче егет-кызлар без. Үз яшьтәшләремә яңа үрләргә таба атларга кыюлык телим! 

«БЕЗНЕҢ БУЫННЫҢ ЯҢАЛЫКЛАРНЫ ҖИҢЕЛРӘК ОТЫП АЛУЫН КҮРӘМ»

ЯРОСЛАВ ВАСИН

Казан авиация институтының Инженерия лицей-интернаты укучысы;

Талантлар Университетына проектлар ясарга өйрәнү теләгем китерде – «Проектка таба 10 адым» исемле курска юлыктым мин анда. Аннары инде «Проектный коллайдер», «Большие вызовы», математика сменасы һәм башкалар булды.

«Дежурный по планете» сменасында катнашуыма аерым тукталасым килә – космик юнәлештәге бәйгеләрне берләштерә торган смена ул. Кемдер роверлар ясый, кемдер стратосферадагы спутникларны күзәтә. Мин ракета төзүдә катнаштым. Сменаның ябылу көнендә без нәтиҗәләрне ТР Фәннәр академиясе президенты Рифкат Нургали улы Миңнеханов һәм Инновацияләргә булышлык күрсәтү фонды киңәшчесе Иван Михаил улы Бортникка тәкъдим иттек.

«Дежурный по планете» бәйгесендә җиңүем миңа Артекка эләгү мөмкинлеге бирде. Анда инде без технологик стартаплар ясарга, аларны тәкъдим итәргә һәм инвестицияләр эзләргә өйрәндек. Талантлар Университетында һәр студент – чын талант, аларның һәрберсе белән аралашу, эшләү рәхәт. Мин буыннар теориясенә ышанмыйм, әмма безнең буынның яңалыкларны җиңелрәк отып алуын күрәм. Хәзер мең дә бер мөмкинлек чоры – күрә белергә генә кирәк!

«ТАЛАНТЛАР УНИВЕРСИТЕТЫНЫҢ ИДЕЯЛӘРЕНӘ ЧЫНЛАП ТОРЫП ТӨШЕНДЕМ»

ПОЛИНА БАБКИНА

Казан милли тикшеренү технология университеты каршындагы сәләтле балалар өчен химияне тирәнтен өйрәнү лицей-интернаты укучысы;

Быел мин «Большие вызовы» фәнни проектлар бәйгесендә җиңү яуладым. «Табигый газны чистарту процессын компьютерлы модельләштерү» проекты белән чыгыш ясаган идем анда. Проектның төп максаты – газны чистарту барышында сарыф ителәчәк көчне киметү. Оренбург якларында табыла торган газ конденсатындагы кислоталы кушылмалар концентрациясе иң югарысы, якынча 5-7 %. Махсус сайлап алынган абсорбентлар һәм реакция өчен тудырылган шартлар ярдәмендә без эксплуатацион чыгымнарны 5-10% ка киметә алдык.

Проектны тормышка ашыруда миңа укытучыларым – Фәүзия Равил кызы Гариева һәм Камил Фәрид улы Хәсәнов ярдәм итте. Остазлар, укытучылардан чыннан да бик күп әйбер тора, чөнки эш процессында аңлашылмаган, сорау тудырган хәлләр булгалый, укытучылар югалып калмаска, шул мәлдә үк проблемаларны чишәргә булыша.

Узган елның февраль аенда безгә «Проектный коллайдер» бәйгесендә катнашырга тәкъдим иткәннәр иде. Мин бу мөмкинлекне кулдан ычкындырырга теләмәдем һәм нәтиҗәдә, нәкъ менә биредә мин Талантлар Университетының идеяләренә чынлап торып төшендем. Командада эшләргә, проектлар ясарга һәм аларны тәкъдим итәргә өйрәнүем дә шунда булды.