«Шәһәрдән авылга кайттым» - Шыңар яшьләре белән танышабыз!

Алардан башка бер генә бәйрәм дә үтми, Сабантуйга бирнә җыйганда да авыл урамы егет-кызлар белән тула. Бу санда шундый актив яшьләрнең берничәсе белән таныштык.

СПЕКТАКЛЬДӘ ТУГАН МӘХӘББӘТ

Ания һәм Фаяз Садыковларның кавышу тарихы кинолардагы кебек. Алар икесе дә Олы Шыңарда туып үскән, бер-берсен кечкенәдән беләләр. Шул вакыттан ук бергә концертларда катнашалар. Ә очрашып китүләренә нәкъ менә спектакль сәбәпче була. Егет-кыз ролен уйнаганда, бер-берсен ошата башлыйлар, әмма алай да кавышу тиз генә булмый әле. Фаяз – армиягә, ә Ания укырга китә. Бер ел узгач кына очраша башлыйлар алар һәм 4 елдан соң гаилә корып җибәрәләр.

– Шәһәрдә үсеш өчен перспектива күп дисәләр дә, авылда да яшьләр өчен барлык мөмкинлекләр дә тудырылган – бары тик теләк кенә кирәк. Безнең авылда мәдәният йорты көн саен ачык: анда шактый яшьләр җыелып, теннис, бильярд уйныйлар.

Шулай ук мин спорт залында баскетбол түгәрәге алып барам – анда да яшьләр яратып йөри. Кызыксындыру чаралары булса һәм яшьләр үзләре кызыксынса, аларга мөмкинлекне табу кыен түгел. Шыңарда олысы да, кечесе дә бик эшчән, тырыш. Әлегә өйләнмәгән егетләр дә, кияүгә чыкмаган кызларыбыз да күп, – дип сөйләде Фаяз. Ул Олы Шыңар мәктәбендә физкультура укыта:

– Укытучы булу теләге мәктәптә укыганда ук уянды, чөнки минем әби белән бабаем да укытучылар – алардан үрнәк ала идем. Тугызынчы сыйныфны тәмамлагач, Арча педагогика көллиятенә укырга кердем. Укып чыгып, һөнәрем буенча эшлисем килде. Физкультура укыта башлавыма да 4 ел булды инде. Үземнең эшемне бик яратам, чөнки балалар белән эшләү ошый. Аларны чын күңелдән яратмасам, мәктәптә эшләргә авыр булыр иде.

Фаяз кечкенәдән авылны яратканга, туган ягында калган. Укырга киткәндә дә авылга якынрак буласы килгән. Мөмкинлек булган саен авылга кайтып китү ягын караган ул:

– Дөресен әйткәндә, армиядән кайткач, шәһәргә китү уе бар иде. Казанда перспектива бар, дибез бит инде. Тик авылның һавасы, кешеләре якынрак булып чыкты. Авылда да бик рәхәтләнеп акча эшләп була. Төп эшеңнән тыш өстәмә эшләр белән шөгыльләнә аласың. Безнең район җирлегендә үз эшләрен булдырган кешеләр дә байтак.

«АВЫЛГА ЯҢАЛЫК КЕРТӘСЕМ КИЛДЕ»

Мәктәп янында гына урнашкан медпунктта Ания фельдшер булып эшли. Иртән эшкә ире белән бергә төшәләр, Фаяз, кан басымын тикшерткән булып, Ания янына «свидание»гә кереп чыккалый икән. Ул бик уңган кыз булып чыкты, төп эшеннән тыш заказга тортлар, ролл ясый:

– Электән, әнидән күреп үскәнгәдер, тортлар ясарга ярата идем. 10 нчы сыйныфта бу эшкә ныклап тотындым. Бер ел элек авылга ниндидер бер яңалык кертәсем килде. Уйладым-уйладым да, ролл ясап карарга булдым. Дөрес уйлаганмын, чөнки хәзерге көндә бөтен кеше заказ бирә. Торт күбрәк вакыт сораганга, заказларны алданрак алам. Алга таба роллы әзерләү буенча остаханә ясыйсым килә. Мәктәп укучылары, яшьләр дә кызыксына – өйрәнәселәре, үсәселәре килә, – ди Ания.

Ул безне дә үзенең тәмле тортлары белән сыйлады. Аннары эшләрен төгәлләп, авылдашларын дәваларга кузгалды.

«ШӘҺӘРДӘН АВЫЛГА КИРЕ КАЙТТЫМ»

Әйткәнемчә, Олы Шыңар авылында җыр-моңга сәләтле яшьләр яши. Киләсе героебыз Рифат Сафин да шундыйлардан. Ул үзенең тормышын иҗаттан башка күз алдына китерә алмый. Кечкенәдән үк бии, җырлый, концертларда актив катнаша, хәзерге көндә туйлар юбилейлар алып бару белән дә шөгыльләнә. Ә үзе ул Сабада заводта эшли:

– Акча ягы әйбәт булсын өчен, берничә юнәлешне бергә алып барырга туры килә. Җырлар яздыру шактый акча сорый. Заводта эшләү миңа зур тәҗрибә бирә. Казанда 3 ел яшәгәннән соң, «Кеше бит авылда да тора», – дип уйладым да, кире кайттым. Авылда тыныч, шәһәрдә ыгы зыгы, бер дә тик торып булмый.

«Булачак хатының “шәһәргә китик” дисә, нишлисең?» – дигән сорауга да җавабы бар Рифатның:

– Әгәр район-авыл җирендә туган, шунда яшәүче кыз белән сөйләшсәң, ул Казанга китик димәс. Кайсы як кызы белән сөйләшергә икәнен үзең карап бетерәсең инде.