Бөтендөнья театр көнендә, 27 мартта, Казан Кремлендә «Театральное Приволжье» дип исемләнгән балалар һәм яшьләр театр коллективлары фестиваленең VI сезон җиңүчеләрен игълан итү тантанасы узды.
Лауреатларның исемнәре Идел буе федераль округының барлык төбәкләрен берләштергән онлайн-трансляция барышында әйтелде.
Бәйге 4 этаптан тора. Региональ этапта театраль төркемнәр үз төбәге эчендә ярышалар. Иң-иңнәрен төбәкара этапка видеога төшереп җибәрәләр. Бүген финал этабы узды: жюри әгъзалары билгеләгән урыннар игълан ителде. Апрель аенда тантаналы бүләкләү кичәсе көтә.
Быел бәйгегә аеруча күп гариза кабул ителгән. Фестивальдә 220 яшьләр театр коллективы, 1235 балалар театр төркеме һәм гомумән 21 578 яшь актерлар катнашты. Шулай ук, 2025 ел «Ватанны саклаучылар елы» дип игълат итү сәбәпле, бәйгедә «Ватанны саклаучыларга багышланган иң яхшы спектакль» дигән махсус номинация барлыкка килгән.
Чарада Татарстан Республикасы мәдәният министры урынбасары Дамир Натфуллин, фестивальнең төбәк этабында җиңгән театр коллективлары — «ЭОС» студентлар театры, «Апуш» татар балалар театр студиясе катнашты. Финал нәтиҗәләрен балалар да, аларның җитәкчеләре да зарыгып көтеп тордылар.
«Апуш» татар балалар театр студиясе укучысы Рәмис Хәкимов «Иң яхшы ир-ат роле» номинациясендә җиңү яулады. Рәмис Т.Миңнуллинның «Авыл эте Акбай» пьесасы буенча сәхнәләштерелгән мюзиклда Акбай ролен уйный.
«Җиңүче булам дип бер дә уйламаган идем, дөресен әйткәндә. «Апуш»ка ике ел элек кенә йөри башладым, аның өчен әле дә шатланып бетә алмыйм. Җитәкчеләремә бик зур рәхмәтемне җиткерәм, алар минем сәләтемне ачтылар. Шулай да, театр юнәлеше буенча укырга керергә планлаштырмыйм. Әммә театр гел күңелемдә булачак, кергән уку йортымда берәр театр коллективы булса, мин анда һичшиксез катнашачакмын», - дип сөйләде Рәмис Хәкимов.
Шулай ук, музыка авторы, «Авыл эте Акбай» спектакленең композиторы Зөлфәт Вәлиуллин «Иң яхшы музыкаль бизәлеш» номинациясендә җиңде.
Татарстан Республикасыннан «Апуш» татар балалар театр студиясе «Театральное Приволжье» фестивалендә «Балалар театр коллективлары һәм студияләре» номинациясендә Т.Миңнуллинның «Авыл эте Акбай» пьесасы буенча сәхнәләштерелгән мюзиклы белән 1 урын яулады.
«Апуш» татар балалар театр студиясенең җитәкчесе Алия Фәйзрахманова һәм музыка режиссеры Ильяс Фәйзрахманов спектакльнең үзенчәлеге турында сөйләделәр:
Чыннан да, бу бик дулкынландыргыч момент. Җиңүебезгә һич ошанып булмый. Мюзиклыбызның үзенчәлеге – ул тере музыка. Димәк, бөтен көйләр дә чын уен коралларында спектакль вакытында уйналды. Бәлки арттырып та әйтәбездер бу сүзне, ләкин татар балалар театрында тере музыкалы спектакль бүгенге көндә әле юктыр дип уйлыйбыз. Оркестрда күбесе – балалар. Шуны да әйтергә кирәк, «Чулпан» мәдәният үзәгендә эшләп килүче студиябез беренче көненнән үк мюзикл юнәлешендә җыелды. Гомумән, ни өчен мюзикл жанры сайланды дигәндә, татар халкы бит ул җырны ярата. «Сүз беткәндә, музыка башлана», диләр халыкта, диде алар.
Эльза Минашаева
Нет комментариев