Дәүләт Советы Рәисе вазифаларын башкаручы Марат Әхмәтов Арча районына эш сәфәре кылды.
Семинар-киңәшмә башланыр алдыннан Габдулла Тукай исемендәге педагогика көллиятендә булды.
Марат Әхмәтов яңартылган «Әлифба» бронза һәйкәлен карады һәм Арча педагогика көллияте территориясендә куелган Габдулла Тукай бюстына чәчәкләр салды. Ул шулай ук көллияттә 1999 елда барлыкка килгән «Әлифба» музеенда да булды. Бүгенге көндә музейда борынгы заманнардан алып бүгенге көнгә кадәр дөнья халыклары язуының барлыкка килүе һәм үсеше турында сөйләүче 1,6 мең экспонаттан торган бай фонд, төрле графика һәм алфавит системалары турындагы материаллар бар.
ТР Дәүләт Советы матбугат хезмәте хәбәр иткәнчә, әлеге зона семинар-киңәшмәсендә районнар һәм авыл җирлекләре башлыклары, шәхси ярдәмче хуҗалыклар һәм гаилә фермалары җитәкчеләре, авыл хуҗалыгы кооперативлары, тармак министрлыклары һәм ведомстволары, банк өлкәсе вәкилләре катнаша. Пленар утырыш кысаларында авыл бизнесына, фермерлык хәрәкәтенә һәм шәхси хуҗалыкларны үстерүгә дәүләт ярдәме чаралары турында фикер алышалар.
Мондый очрашулар республикада ел саен уздырыла. Узган атнада семинарлар Яңа Чишмә һәм Минзәлә районнарында узды, – диелә хәбәрдә.
Нет комментариев