Быел Россиядә пандемия һәм санкцион чикләүләр чорында кертелгән машина йөртү таныклыкларын автомат рәвештә озайту чарасы бөтенләй гамәлдән чыкты.
Хәзер, хокукларының гамәлдә булу вакыты чыккан, машина йөртүчеләргә гомуми тәртиптә алыштыру процедурасын узарга туры киләчәк. Югыйсә, документны куллану хокуксыз йөрү кебек саналачак.
Исегезгә төшерәбез, машина йөртү таныклыгының стандарт гамәлдә булу вакыты 10 ел тәшкил итә. Бу чор узгач, документ юридик көчен югалта, һәм аның белән автомобиль белән идарә итәргә ярамый. 2026 елда машина йөртүчеләрнең ике төп категориясенә алмаштыру кирәк булачак:
Беренчесе – 2016 елда хокук алган яки яңарткан кешеләр. Нәкъ менә аларның быел законлы ун еллык срогы бетә.
Икенчесе – машина йөртү таныклыгын автомат рәвештә озайту чарасын кулланучы йөртүчеләр. Сүз 2023 елда вакыты чыккан таныклыклар турында бара. Ул вакытта дәүләт автомат рәвештә аларның гамәлләрен ЮХИДИга мөрәҗәгать итмичә өч елга озайтты. Бу өч еллык чор нәкъ менә 2026 елда тәмамлана, шуңа күрә мондый хокукларның ияләренә документны ел ахырына кадәр алыштырырга өлгерергә кирәк.
Нет комментариев