Узган ел Татарстан Язучылар берлегенә бер төркем иҗатчы яшьләр килде, бүген берлектә яшьләрне, иҗат, әдәбиятны сөючеләр җыела, берлек аларны яңа форматтагы чараларга дәшә.
Шундый чараларның берсе 7 февральдә узган Фәттах Фест иде.
Фәттах Фест язучы, Габдулла Тукай премиясе иясе, тарихи романнар авторы Нурихан Фәттах истәлегенә багышланган. Чараның максаты – борынгы тамырларыбыз турында язылган әсәрләрне яшьләргә аңлаешлы тел белән күрсәтү.
Фестиваль яшьләрне дә, олы буын кешеләрен дә берләштерә алды. Көн дәвамында килгән кунаклар өчен фәнни-популяр лекцияләр укылды, уеннар һәм җанлы әңгәмә оештырылды. Тамашачылар заманча сәнгать әсәрләре белән танышты, кымыз һәм корт белән сыйланды. Кичә «Дала авазы» дип аталган шигъри-музыкаль джем белән тәмамланды. Импровизациядә бөтен теләгән музыкантлар һәм шагыйрьләр катнаша алды.
Фәттах Фест – борынгы мәдәниятебезгә, тарихыбызга һәм әдәбиятыбызга яңача карау.
Чараны Татарстан Республикасы Язучылар берлеге, Бөтендөнья татар яшьләре форумы, Ачык университет проекты һәм язучының варислары – Зөләйх а Камалова һәм Руслан Ибраһим оештырды.
Фестивальнең сәнгать җитәкчесе: Ильяс Фәрхуллин
Проект җитәкчесе: Ркаил Зәйдулла
Фотограф: Фирүзә Вәлиева
Нет комментариев