ГАЛӘМГӘМЕ ӘЙТИМ РӘХМӘТЕМНЕ?..

***
Галәмгәме әйтим рәхмәтемне? –
Синең яктан җилләр исмәде...
Синсезлегем аша таныдым мин
Йөрәгемдә йөрткән хисләрне.
Синсезлегем аша белдем: җанга
Ничә тонна сагыш сыяла.
Кайчан күңел сызланып һәм әрнеп,
Ташланырдай була кыядан...
Елмаермын, теләп ап-ак бәхет.
Хушлашканда сиңа ялынмам...
Сөюләрнең иң көчлесе туа
Аерылганда газиз ярыңнан.
Галәмгәме әйтим рәхмәтемне? –
Синең яктан җилләр исмәде.
Синсезлегем аша таныдым мин
Кабатланмас керсез хисләрне.