Декоратив-гамәли сәнгать осталары арасында уздырылучы «Саумы, Казан!»/«Здравствуй, Казань!» бәйгесенә гаризалар җибәрү өчен бер айдан азрак вакыт калып бара.
Конкурста 18 яшьтән өлкәнрәк профессиональ осталар декоратив-гамәли сәнгатьнең дүрт юнәлеше: күн эшкәртү, керамика, киез басу һәм чигү буенча катнаша ала. Игътибар үзәгендә – борынгы Казан мифлары һәм риваятьләре.
Бәйгедә катнашу өчен 2024 елның 20 августына кадәр (гаризалар кабул итү һәм җиңүчеләрне билгеләү вакыты кичектерелде) saumykazan@mail.ru электрон адресына «“Саумы, Казан!” конкурсына» тамгасы белән конкурска тәкъдим ителәчәк эшнең фотосы белән гариза юлларга кирәк. Гаризада катнашучы турында белешмә тутырыла: фамилиясе, исеме, әтисенең исеме, туган көне, эш/уку урыны, яшәү урыны, элемтә өчен телефон, электрон адрес, шулай ук конкурс эшенең исеме, конкурс эшенең нинди юнәлештә иҗат ителүе (күн эшкәртү, керамика, киез басу, чигү), размерлары, аны ясау датасы. Катнашучы теләге буенча конкурс эше турында кыска аннотация язарга да мөмкин.
Конкурс эшләренең 2024 елдан да иртәрәк ясалмавы шарт, саны буенча чикләүләр юк. Катнашучы бәйгегә тәкъдим иткән эшнең авторы булуын һәм беркемнең дә авторлык хокукларын бозмавын гарантияли.
Онлайн сайлап алу турыннан соң, икенче этапка узган конкурс эшләрен кабул итү оештырылачак. Җиңүчеләр 30 октябрьгә кадәр игълан ителәчәк. Бәйгенең нәтиҗәсе буларак күргәзмә уздыру һәм буклет чыгару планлаштырыла.
Җиңүчеләр ике яшь төркеменә бүленеп, дүрт юнәлеш буенча бүләкләнәчәк: 18 яшьтән 35 яшькә кадәр һәм 35 яшьтән өлкәнрәкләр. Һәр юнәлештә һәм яшь категориясендә 3 җиңүче булачак:
I урын – 100 000 сум;
II урын – 85 000 сум;
III урын – 65 000 сум (салым түләүләре белән).
Нет комментариев