«Ялкын» журналы редакциясе коллективына яңа баш мөхәррир тәкъдим ителде

Журналны җитәкләгән Илназ Фазуллин бүген «Ватаным Татарстан» газетасы коллективына баш мөхәррир итеп тәкъдим ителде.

«Ялкын» журналын «Татар-информ» мәгълүмат агентлыгының татар редакциясе һәм «Интертат» сайты журналисты Энҗе Габдуллина журналны җитәкләячәк, дип хәбәр итә «Татар-информ»

Яңа җитәкчене коллективка «Татмедиа» республика матбугат һәм массакүләм коммуникацияләр агентлыгы житәкчесе Айдар Сәлимгәрәев тәкъдим итте. Ул яңа баш мөхәрриргә матур һәм кызыклы итеп эшләргә теләде.

«Җитәкче ролендә беренче тәҗрибәм. Димәк, үсәргә, алга барырга вакыт җиткән. Миңа ышанычыгыз өчен Айдар Сәетгәрәевич, Сезгә, Илназ абый сезгә бик зур рәхмәт. «Ялкын» бай тарихлы, дәрәҗәле редакция. Мин «Ялкын» кызлары белән таныш. Бер команда булып, матур итеп эшли алуыбызга да ышанам һәм сезнең теләктәшлеккә өметләнәм. Рәхмәт!» – диде Энҗе Габдуллина.

Энҗе Габдуллина 2000 елда Актаныш районында туган. КФУның Журналистика һәм медиакоммуникацияләр Югары мәктәбендә бакалавр и магистр дәрәҗәсендә белем алган.