«Идель» журналы редакциясе «Цена легких денег» исемле документаль фильм чыгарды

16 октября 2025 - 12:00 Автор:

Идел

Быел июль аенда «Идель» редакциясе Пермьдә урнашкан балигъ булмаганнар өчен колонияне күреп кайткан иде.

Гамово авылында бер ялгыш адым аркасында рәшәткә артына эләккән дүрт яшь кешенең язмышы турында документаль фильм төшерелде. Фильмның «Цена легких денег» дип аталуы юкка түгел, ул – тамашачыларга мөһим кисәтү белән мөрәҗәгать итүгә нигезләнгән. Әлеге документаль фильм «ТАТМЕДИА» АҖ һәм «Татмедиа» Республика матбугат һәм массакүләм коммуникацияләр агентлыгы ярдәмендә төшерелгән һәм эксклюзив рәвештә Rutube мәйданчыгында чыкты.

«Төшерү барышында без шундый шартларда үкенеч тулы хисләр, югалган мөмкинлекләрне аңлап яшәү нинди булганына төшендек. «Цена легких денег» фильмы – нарко-курьерлык һәм дилерлык китерә торган ачы чынбарлык турында. Бу – җинаятьләр, кызганыч язмышлар турында гына түгел, ә һәркемне үз гамәлләренең нәтиҗәсе нәрсәгә китерергә мөмкин икәнен кисәтү турында», — дип билгеләп үтте «Идель» журналының баш мөхәррире Рәмзия Галимова.

Наркотиклар әйләнешен контрольдә тоту буенча Федераль хезмәт мәгълүматларына караганда, Россиядә тыелган матдәләрне сату һәм тарату белән бәйле җинаятьләр саны соңгы биш елда 20% ка арткан. Шул исәптән Татарстан Республикасы да кискен зонасында. Наркоҗинаятьләр өчен хөкем ителгәннәрнең 30% тан артыгы — 18 яшьтән 25 яшькә кадәрге яшьләр. Бу саннар проблеманың җитдилеген һәм наркобизнеска җәлеп итү аркасында килеп чыгарга мөмкин булган нәтиҗәләр турында фикер алышу кирәк икәнен ассызыклый.

«Цена легких денег» фильмында нәкъ менә шул темалар күтәрелә. Яшьләр мисалында «Идель» редакциясе яшь буынга бер ялгыш юл сайлауның үз тормышларына гына түгел, якыннарының тормышына да кагыла торган куркыныч нәтиҗәләргә китерәчәген күрсәтә. Фильм наркотикларга җиңел караш һәм тиз табышка омтылып, үз сәламәтлегеңне һәм хәтта гомереңне югалтуга китерәчәге турында. Моннан тыш, фильмда җәмгыять һәм системаның яшьләргә мондый хаталардан качарга ничек ярдәм итә алуы турындагы сораулар күтәрелә. Ул шулай ук гаилә һәм дуслар тарафыннан ярдәм әһәмияте, шулай ук наркотиклар һәм аларның нәтиҗәләре турында ачык диалог кирәклегенә игътибарны юнәлтә. Ахыр чиктә фильм – кисәтү генә түгел, проблемалар турында сөйләү, ярдәм эзләү һәм аңлы рәвештә гамәлләр кылырга өндәү дә.

«Без мондый темаларны күтәрергә һәм фикер алышырга кирәк дип саныйбыз. Безнең фильм – ул документаль эш кенә түгел, ә авыр хәлдә калганнарны тыңлау омтылышы да. Бу вакыйгалар яшьләр өчен кисәтү булыр һәм коточкыч хаталар булдырмаска ярдәм итәр дип өметләнәбез. Фильмны бөтен Татарстан буенча мәктәп укучыларына һәм студентларга очрашуларда һәм башка чараларда күрсәтергә планлаштыралар», – дип өстәде Рәмзия Галимова.

Документаль фильмны Rutube мәйданчыгында эксклюзив рәвештә түбәндәге сылтама буенча карарга мөмкин: https://rutube.ru/video/e4efa6f04db525bbcb7bb79ef880048b