Быел ДәртФестта ниләр көтелә?

Брендлар

Фестиваль милли мотивлар белән бизәлгән 10 якты коллекцияне мода күрсәтүендә берләштерәчәк, ә дизайн-маркетта Татарстанның брендлары һәм сәләтле осталары белән танышырга мөмкин булачак. 

Брендларга килгәндә, алар – salkyn.ton, SABR, Nazly, Риваят, «УРМАНАЙ», Wooden Duck, Альбина Стоянова остаханәсе, Ансат, MADILAMA, АСК ТюррКа һәм башкалар. Бу көнне Казан Кирмәне чын мәгънәсендә мода һәм зәвык үзәгенә әйләнәчәк. Орнаментларның нәфислеге, тукымаларның байлыгы һәм силуэтларның үзенчәлеге берләшеп, кабатланмас матурлык тудырачак.

Музыка

Биредә төрле сәнгать юнәлешләре очраша: Noqta инструменталь тәҗрибәләре белән таң калдырачак, Ыспай бит поэтик диалоглары аша күңелләргә үтеп керәчәк, ә Айрат Хайруллин мәхәббәт турында җиңел һәм ихлас җырлары белән җылы хисләр уятачак. АлияНур безне хип-хоп, R&B һәм поп кушылган җырлары белән сокландырачак, ә МС Каршы тормыш турында туры һәм ихлас сөйләп, тыңлаучыларның йөрәгенә үтеп керәчәк. Казанның K3DERT триосы жанрлар белән экспериментлар ясап, синти-поптан рокка кадәр үзенчәлекле чыгыш тәкъдим итәчәк. Elina үзенең ихлас җырлары белән сәхнәне тулыландырачак, ә Tubatay Beats традицияләрне заманча яңгыраш белән бергә бәйләп, үзенчәлекле ритмнар тудырачак.  Zarina, Ilgiz һәм Malsi Music тамашачыларга дәртле бэнгерлар һәм күңелгә үтеп керә торган балладалар бүләк итеп тәмамлаячак.

Акыл фабрикасы

Шулай ук фестивальдә «Акыл фабрикасы» кысаларында кызыклы лекцияләр укылачак. Балерина Камилә Галиева – «Татар балеты турында сез белергә тиешле базовый минимум», кинорежиссер Александр Далматов – «Йолдыз булмаса, кино буламы?», композитор, музыка белгече Фәрхад Бәхтияри – «Заманча сәнгатьтә борынгы татар музыкасы үзенчәлекләренең кайбер чагылышлары», татар модасы визионеры Диана Басырова – «Креатив брендка продукт булдыру һәм таныту вакытында нәрсәләрне белү мөһим?» темасына чыгыш ясаячаклар.